طوف.. وشوف شوف الجمال شوف الراحة.. الناس مبسوطة ومرتاحة.. وكل الناس مش متضايقة.. وشوارع بلدنا كمان رايقة.. ومفيش عندنا أى مشاكل.. والأسعار رخيصة وف النازل.. والكل محمل أو شايل.. وأحسنها معاملة بنتعامل.. والشعب ف خير النيل غرقان.. ونيلنا فاضى مافيهش حيتان.. والكهربا خلوها بلاش.. والغاز بقى بالقسط وكاش.. والكل فرحان متهنى.. والناس ف الشارع بتغنى.. وشقق فاضية بقت بالكوم.. من غير مقدم صحى النوم.. ويفط الشقق على الشبابيك.. فاضية ومفروشة أو تمليك.. والخير ده كله ليا وليك.. تدفع كاش أو بالتقسيط.. والموبيليا بقت فساكونيا خشب ببلاش ولا حد عبيط.. والجزمة الجلد بخمسة جنيه.. تتقمع بيها وتعمل بيه.. والبدلة الشيك بالعشرة جنيه.. وفساتين برضه كمان سواريه.. ودروس خصوصية بس مفيش.. التدريس وعليه تفتيش.. والأتوبيسات ورا بعض كمان.. فاضية وفيها ميت ألف مكان.. والبنزين أرخص م الشاى.. ح يكون مجانا الشهر الجاى.. والإنتاج عندنا بيزيد.. وصحة ولادنا بمب حديد.. وبنصدر منه لكل مكان.. أمريكا أولهم واليابان.. ومكفينا وفايض منه.. ومافيش زيه ولا أحسن منه.. والناس بتغنى يا عينى يا ليل.. علشان دى كدبة أبريل.. مجدى الشربينى
حسن رجب المدير العام
تاريخ التسجيل : 12/03/2010
موضوع: رد: طوف.. وشوف الجمعة أبريل 02, 2010 1:35 am
كل شهر و انت بخير بمناسبة شهر ابريل و كذبة ابريل
خاطرة ممتازة و
موفق دائماً و بإنتظار المزيد
ابراهيم عيسى إدارة عامة
تاريخ التسجيل : 18/03/2010
موضوع: رد: طوف.. وشوف الأحد أبريل 11, 2010 9:22 pm
السلام عليكم ورحمه الله وبركاته بصراحه كل شىء تمام كما وصفت واكتر والعكس صحيح وربنا يوفقنا فى الاسعار القادمه وتكون ارخص كمان شويه وتكون كذبه مايو مش ابريل هههههههههههه جميله وربنا يوفقك وبانتظار المزيد من عجائب النيل وشكرا
